ໂດຍການເປັນປະທານ ຂອງທ່ານ ປອ ສອນໄຊ ສີພັນດອນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ, ທ່ານ ປອ ລຽນ ກິແກ້ວ ກຳມະການສູນກາງພັກ, ລັດຖະມົນຕີ ກະຊວງກະສິກຳ ແລະ ປ່າໄມ້, ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ທ່ານ ລັດຖະມົນຕີ, ຮອງລັດຖະມົນຕີ, ແຂກຜູ້ມີກຽດ ທັງພາຍໃນ ແລະ ຕ່າງປະເທດ ແລະ ນ້ອງນ້ອຍເຍົາວະຊົນ ເຂົ້າຮວ່ມໃນງານ.

ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້, ກະຊວງ ກະສິກຳ ແລະ ປ່າໄມ້. ໄດ້ຂື້ນກ່າວລາຍງານ ປະຫວັດຄວາມເປັນມາ ຂອງວັນສຳຄັນດັ່ງກ່າວ ຕົ້ນໄມ້ແມ່ນມີຄວາມສຳຄັນຢູ່ໃນລາວ ກໍ່ຄືໃນທົ່ວໂລກ, ກ່ອນນີ້ 37 ປີ(1980) ໂດຍເຫັນໄກ້ຄວາມໝາຍຄວາມສຳຄັນຂອງຊັບພະຍາກອນປ່າໄມ້ຕໍ່ກັບການພັດທະນາເສດຖະກິດ-ສັງຄົມແຫ່ງຊາດ, ຕໍ່ກັບການປົກປັກຮັກສາສິ່ງແວດລ້ອມ ກໍ່ຄືການປັບປຸງຊີວິດການເປັນຢູ່ ແລະ ແກ້ໄຂຄວາມທຸກຍາກຂອງປະຊາຊົນບັນດາເຜົ່ານັ້ນ, ໃນວັນທີ່ 9 ກຸມພາ 1980 ປະທານໄກສອນ ພົມວິຫານ ອາດີດປະທານສະພາລັດຖະມົນຕີ ໄດ້ອອກມະຕິຕົກລົງ ສະບັບເລກທີ 48/ສພລຖ ວ່າດ້ວຍ ການກຳນົດ ວັນທີ່ 1 ມິຖຸນາ ຊຶ່ງເປັນວັນເດັກນ້ອຍສາກົນ ເປັນວັນປູກຕົ້ນໄມ້ແຫ່ງຊາດ ສປປ ລາວ ແລະ ໄດ້ຖືກກຳນົດໃນກົດໝາຍ ທັງເປັນການປູກຈິດສຳນຶກ ໃຫ້ແກ່ອະນຸຊົນ ແລະ ເຍົາວະຊົນຂອງຊາດ ທັງປຸກລະດົມທົ່ວປວງຊົນ ເຂົ້າຮ່ວມການປູກໄມ້, ການຄຸ້ມຄອງປ່າໄມ້ ປົກປັກຮັກສາ ແລະ ພັດທະນາປ່າໄມ້ ເພື່ອແນໃສ່ເຮັດໃຫ້ປ່າໄມ້ມີຄວາມອຸດົມສົມປູນ ເປັນທ່າແຮ່ງເຂົ້າໃນການພັດທະນາເສດຖະກິດແຫ່ງຊາດ.ປະຈຸບັນເນື້ອທີ່ປູກໄມ້ທັງໝົດທົ່ວປະເທດ 470,200 ກວ່າເຮັກຕາ, ເທົ່າກັບ 94% ທຽບໃສ່ແຜນປູກໄມ້ຮອດປີ 2020( 500,000 ຮຕ), ອັນພົ້ນເດັ່ນໄມ້ທີ່ນິຍົມປູກແມ່ນ ໄມ້ສັກ, ໄມ້ເກດສະໜາ, ໄມ້ວິກ, ໄມ້ຢາງພາລາ ແລະ ໄມ້ພື້ນເມືອງລາວ ເຊິງແມ່ນປະຊາຊົນ ຊາວກະສິກອນ, ພະນັກງານ, ທະຫານ, ຕຳຫຼວດ ແລະ ຜູ້ປະກອບການ ນັກລົງທຶນ ທັງພາຍໃນ ແລະ ຕ່າງປະເທດ. ງານວາງສະແດງເບ້ຍໄມ້, ງານວັນປູກຕົ້ນໄມ້ແຫ່ງຊາດ ແລະ ວັນເດັກນ້ອຍສາກົນ ວັນທີ່ 1 ມິຖຸນາ 2017 ສູນການຄ້າ ລາວ-ໄອເຕັກ ແມ່ນມີຫຼາຍກວ່າ 27 ພາກສ່ວນ ພາກລັດ, ບັນດາບໍ່ລິສັດ, ຫ້າງຮ້ານ, ຜູ້ປະກອບການ ເຊິ່ງນຳເບັ້ຍໄມ້ໃຫ້ໝາກ ແລະ ໄມ້ເສດຖະກິດ ຫຼາຍກວ່າ 30ຊະນິດ.

 ຈຸດປະສົງຫຼັກຂອງການຈັດງານໃນມື້ນີ້ແມ່ນ ໜຶ່ງ: ເປັນການສ້າງຂະບວນການສຳລັບວັນປູກຕົ້ນໄມ້ແຫ່ງຊາດ ຕິດພັນກັບວັນສະເຫຼີມສະຫຼອງວັນເດັກນ້ອຍສາກົນ; ສອງ: ເປັນການປູກຈິດສຳນຶກໃຫ້ແກ່ເຍົາວະຊົນ ແລະ ອະນຸຊົນ ລຸ້ນຫຼັງໃຫ້ຮູ້ຈັກຄຸນປະໂຫຍດຂອງໄມ້, ໃຫ້ເຂົາເຈົ້າຮູ້ຮັກ, ຮູ້ຫວງແຫນ, ອະນຸຮັກ ແລະ ປົກປັກຮັກສາປ່າໄມ້ ແລະ ຊັບພະຍາກອນປ່າໄມ້; ສາມ: ເປັນການປຸກລະດົມທົ່ວປວງຊົນ ເຂົ້າຮ່ວມໃນວຽກງານປ່າໄມ້ ນັບແຕ່ຂອດການກະກຽມແກ່ນພັນໄມ້, ການກ້າເບ້ຍໄມ້, ການປູກໄມ້ ຈົນຮອດການຄຸ້ມຄອງປົກປັກຮັກສາ ແລະ ພັດທະນາປ່າໄມ້ແນໃສ່ເຮັດໃຫ້ມີຄວາມອຸດົມສົມປູນ, ສາມາດປະກອບສ່ວນເຂົ້າໃນການລຶບລ້າງຄວາມທຸກຍາກ ຂອງປະຊາຊົນບັນດາເຜົ່າ ແລະ ສີ່: ເພື່ອປະກອບສ່ວນເຂົ້າໃນການຈັດຕັ້ງຍຸດທະສາດປ່າໄມ້ 2020 ຂອງລັດຖະບານ ຄືເພີ້ມຄວາມປົກຫຸ້ມໃຫ້ໄດ້ 70% ແລະ ປູກໄມ້ໃຫ້ໄດ້ 500,000 ຮຕ ໃນປີ 2020.

 

 

ຮຽບຮຽງໂດຍ: ສຸວັນນາ ຈັນທະລືສີ

ກວດແກ້ໂດຍ: